Revista dixital de la Fundación de Cultura del Conceyu d’Avilés Revista dixital de la Fundación de Cultura del Conceyu d’Avilés Añu 2019 -Númberu 26 - Ochobre 2019

Apúntate al nuestru boletín

Xornaes Cervantines

IV Xornaes Cervantines, Avilés 2019 «Los Quijotes de Mingote»

Palaciu de Valdecarzana. Dende'l 9 d'ochobre hasta'l 5 d'avientu de 2019

IV Xornaes Cervantines n'Avilés, 2019

Les IV Xornaes Cervantines d'Avilés lleven al Palaciu de Valdecarzana la esposición Los Quijotes de Mingote, 80 dibuxos orixinales qu'Antonio Mingote fizo pa ilustrar Don Quijote de La Mancha, edición de Martín de Riquer, editáu por Editorial Planeta en 2005, espublizáu con motivu del cuartu centeneriu de la publicación de la Primer Parte d'El Quijote, y del que se ficieron varies ediciones.

Esta esposición entámala'l Serviciu de Promoción Cultural del Conceyu d'Avilés y l'Intitutu Quevedo de les Artes del Humor de la Fundación Xeneral de la Universidá d'Alcalá (onde Mingote ye presidente d'honor pa siempre) entidá que media cola Fundación Mingote y cola so familia pa que la obra del nomáu humorista llegue a Avilés.

La esposición, una esbilla esquisita de la gran obra cervantina d'Ángel Antonio Juilián Orson Dulce Nombre de María Mingote Barrachina, nome del ilustre humorista gráficu, tamién tien el cuadernu colos bocetos del artista, rellacionaos colos dibuxos que s'esponen, la verdadera cocina del dibuxante, onde s'aprecia'l so estilu más puru, constituyendo un elementu estraordinariamente didáuticu pal espectador y pal alumnáu participante nos talleres programaos.

D'estos bocetos xurdieron les obres definitives coles que s'ilustraron los cuatro volúmenes de Don Quijote de La Mancha, y que tamién van tar a la vista'l públicu que tien de pasar pel Palaciu de Valdecarzana, pa contemplar al mesmu tiempu los orixinales de Mingote y la edición final del llibru.

La intención de Mingote cuando empieza col proyeutu d'ilustra El Quijote foi'l de «reflexar les actitúes, los sentimientos y las reaiciones de los personaxes»,resaltando la faceta cómica de la obra. Con ello Mingote plantegóse como oxetivu motivar la llectura del testu orixinal, el mesmu que tien les Xornaes Cervantines que se celebren n'Avilés.

Tamién, cola esposición Los Quijotes de Mingote, dende'l Conceyu d'Avilés ríndese homenaxe al llegáu intelectual, vital y artísticu d'Antonio Mingote nel centenariu del so ñacimientu, contribuyendo con esta esposición a encumar la so faceta humana y creativa.

Siempre esmolecíu polos demás más p'allá del so aspeutu, sintiendo un respetu fondu polos personaxes y fechos históricos y los sos enguedeyos, acabó siendo ún de los meyores cronistes de la sociedá española de la segunda metá del sieglu XX y d elos primeros años del XXI.

Dedicóse a munchos oficios, destacando sobre too como novelista con bayura de publicaciones. Ensin embargo ye como humorista gráficu como se lu va recordar por ser indiscutiblemente ún de los más destacaos de la so dómina, quien a lo lalrgo de la so llarga vida artística asoleyó más de trenta y cinco mil dibuxos.

Ricardo Fernández

Coordinador de las IV Xornaes Cervantines

Los Quijotes de Mingote

La esposición Los Quijotes de Mingote, que se presenta nel Palaciu de Valdecarzana dientro de les IV Xornaes Cervantines  n'Avilés, amuesa más de 80 trabayos orixinales qu'Antonio Mingote realizó pa ilustrar Don Quijote de la Mancha, edición de Martín de Riquer, editáu por Editorial Planeta en 2005, con motivu del cuartu centenariu de la publicación de la Primera Parte de El Quijote, y del que se ficieron varies ediciones.

Coles obres esbillaes, les persones que visiten la esposición pue siguir el filu narrativu d'El Quijote, con dibuxos qu'ilustren los pasaxes más conocíos de la obra de Cervantes, como Locura de Don Quijote, Don Quijote se arma caballero en una venta, Don Quijote y los molinos de viento o El cabrero cuenta la historia de Grisóstomo y la pastora Marcela, y otros menos conocíos. La esposición recueye obra de 82 capítulos (40 de la primer parte y 42 de la segunda), y inclui dalgunos de los bocetos fechos por Antonio Mingote, asina como varies ediciones que s'espublizaron colos sos dibuxos.

Mingote yera un llector incansable d'El Quijote y que lu conocía como personaxe cercanu y íntimu. Nel momentu de presentar la obra l'humorista manifestó que la so itención foi «... reflexar les actitúes, los sentimientos y las reaiciones de los personaxes», resaltando lo qu'hai nel libru de cómico. Otru oxetivu de Mingote foi facer que xurdiere'l pruyimientu por lleer El Quijote, obra que «ye una fiesta pa que'l dibuxante la pueda ilustrar».

Juan García

Comisariu de la esposición

Ángel Antonio Mingote Barrachina (Sitges. Barcelona, 1919/Madrid, 2012) foi un dibuxante, escritor, periodista y humorista gráficu. Miembru de la Real Academia Española. Tuvo'l títulu nobiliariu de primer marqués de Daroca (2011). Caderalgu honoríficu del Humor y Doctor Honoris Causa pola Universidá d'Alcalá y pola Universidá Rey Juan Carlos (únicu humorista gráficu distinguíu con un reconocimientu asina).

En 1966 ABC instituyó'l Premiu de Periodismu Gráficu Mingote, qu'algamó na so primer edición (1967). Ente les sos distinciones destaquen el Premiu Víctor de la Serna (1979), Premiu Blancu y Negru (1980), Premiu Nacional de Periodismu (1980), Premiu Formentor del Humor y la Tolerancia (1984), Premiu Iberoamericanu d'Humor Gráficu Quevedos, convocaáu polos ministerios d'Educación, Cultura y Deporte y el d'Asuntos Esteriores y Cooperación (1998), Premiu d'Humor Gato Perich (2001), Premiu Luca de Tena (2003). Collaborador como humorista gráficu en La Codorniz, Blanco y Negro, Interviú y Ínsula, ente otres publicaciones, y autor de munches primeres planes n'ABC. En 2012, añu nel que morrió, nómenlu presidente d'honor del Institutu Quevedo de les Artes y del Humor. Almirador de Miguel de Cervantes y llector permanente d'El Quijote, ilustró la gran novela del mui nomáu autor con muncha sensibilidá, convirtiéndose nun de los grandes ilustradores que s'ocuparon de la obra cervantina.

Catálogu de la esposición

Programa de les IV Xornaes Cervantines n'Avilés 2019

Más información

Palaciu de Valdecarzana

Cai del Sol, 2

33402 Avilés

T. 985 510 667

Entrada llibre y de baldre hasta completar aforu

  • © 2019 Fundación de Cultura. Conceyu d’Avilés. | Avisu llegal |