Revista dixital de la Fundación de Cultura del Conceyu d’Avilés Añu 2020 -Númberu 29 - Xunetu 2020

cicLaC, Centru d'Interpretación del Cementeriu La Carriona ye un espaciu espositivu pioneru n'España y, xunto col Muséu de la Historia Urbana d'Avilés, formen la rede de museos municipales de la ciudá.

Son autores de plan y discursu museográficu Manuel Ángel Hidalgo Menéndez y Ricardo Fernández López. Cola rehabilitación de les viviendes antigües del conserxe y capellán, recupérase fuera del cementeriu el diseñu orixinal de Ricardo Marcos Bausá, arquiteutu que proyeutó'l cementeriu avilesín en 1890.

Nel percorríu pel cicLaC les persones que lu visiten van atopase con una riestra paneles qu'amuesen el contestu históricu nel que se llevanta'l cementeriu, la so fechura a lo cabero'l sieglu XIX, los principales elementos artísticos con obres d'artistes de renome como Cipriano Folgueras, Manuel del Busto o Federico Ureña, los avilesinos más significativos ellí enterraos como Armando Palacio Valdés, Julián García San Miguel, Benjamín y Julián Orbón, Marcos del Torniello..., asina como una mención a los antiguos cementerios de la ciudá y a los otros dos qu'hai nel Conceyu: el parroquial de San Cristoba y el de Valliniello, tamién municipal, amosando asina l'Avilés d'aquella dómina.

El cuerpu espositivu complétenlu delles vitrines con reproducciones facsimilares de proyeutos de panteones, solicitues de mediaos del sieglu XIX o proyeutos que nun se ficieren, procedentes del archivu del Conceyu y dos proyeiciones audiovisuales, una de la Ruta Europea de Cementerios y otra del propiu cementeriu avilesín.            

El o la visitante tien un planu col que puede siguir los itinerarios "Espaciu d'arte" y "Sitiu de memoria" colos que pue percorrer esti preciosu cementeriu, descubriendo'l valor artísticu del mayor muséu al aire que tien Avilés.

Actividaes del Conceyu rellacionaes

Participación nel proyeutu européu Eucemet (xunto colos cementerios de Chipre y Francia).

Plan Direutor de los Cementerios del Conceyu

Entrada n'Asociación Europea de Cementerios y na Ruta Europea de Cementerios Significativos del Conseyu d'Europa, xunto con otros tan emblemáticos como'l cementeriu Père Lachaise de París, o los de Roma, Londres, Hamburgo, Madrid o Barcelona.

Fai clic sobre la imaxen pa ver el carrusel