Revista dixital de la Fundación de Cultura del Conceyu d’Avilés Revista dixital de la Fundación de Cultura del Conceyu d’Avilés Añu 2019 -Númberu 26 - Ochobre 2019

Apúntate al nuestru boletín

Factoría Cultural

Factoría Cultural d'Avilés

Centru multidisciplinar de creación



 

Antigua fábrica Confecciones CaminoLa Factoría Cultural, centru artísticu multidisciplinar, ta nel edificiu de lo que foi l'antigua fábrica de camises Confecciones Camino, llevantáu en 1950, pal desarrollu de l'actividá testil.

Foi en 2007 cuando entamaron les obres de la Factoría Cultural, abriendo les puertes en 2010, dependiendo de la Fundación  de Cultura del Conceyu d'Avilés, que-y da'l presupuestu tolos años pal so funcionamientu.

Factoría CulturalL'edificiu tien 4 plantes, dispón de biblioteca de consulta y préstamu pal alumnáu del centru (catálogos de cerámica, llibros téunicos, d'historia, pintura, escultura...); almacén, dos vestuarios, cuartu pa fornos elléctricos, asina como otru espaciu pa fornos de gas; dos clases d'informática (que s'empleguen pa dar cursos pa deprender l'usu de programes informáticos, fotografía, programes de retoque dixital d'imáxenes, redes sociales, etc.); cuatro clases pa talleres de cerámica, una clase pa taller de pintura, un clase pa taller d'encuadernación, marroquinería y vidru y una clas pal grabáu.

Estructura de la Factoría Cultural

Escuela Municipal de Cerámica

Ún de los enfotos de la Factoría Cultural ye'l de la formación; poro, nel edificiu ta la Escuela Municipal de Cerámica, centru que s'inaugurare na plaza de Camposagrado hai casi tres décades, no qu'anguaño ye la sala esposiciones de pasu Antigua Escuela de Cerámica (Dáse-y el mesmu nome pa protexer l'alcordanza del que foi ún de los centros d'enseñances artístiques más importantes d'España), dependiente del Muséu de la Historia Urbana d'Avilés, implantación museográfica qu'orixinó'l pasu nel añu 2010 de la Escuela a estes nueves instalaciones.

La Escuela Municipal de Cerámica, fundóse enriba los pegoyos de l'alfarería tradicional de Miranda, esmoleciéndose dempués, sobre too, pola cerámica contemporánea, magar que l'alfarería sigue incluyéndose nes téuniques y materies que se dan nel centru.

La Escuela Municipal de Cerámica ye centru collaborador col Serviciu d'Empléu del Principáu d'Asturies, y da cursos empobinaos sobre too  a persones que nun tienen trabayu; cursos como Moldes y vaciados, Alfarería Tradicional, de nivel 1 y 2 y de cualificación profesional; algamando l'alumnáu un certificáu acreditativu.

Esti añu fueron casi doscientos los alumnos y alumnes que se matricularon nos cursos ordinarios de la Escuela, d'ochobre a xunu. La ufierta educativa pal añu mantién los cursos d'aniciu, afondamientu, taller llibre, cambiando la temática de dos de los talleres tolos años para introducir nueves téuniques y pa que la ufierta nun seya repetitiva.

Asina, los cursos p'adultos y los infantiles ufiértense dende'l 2 de setiembre, pudiendo matriculase n'horariu de 9:00 a 14:00h.

Respeuto a la ufierta formativa que pue facer l'alumnáu infantil, ente los 6 y 16 años, atopamos cursos de Cerámica (6 grupos), de Pintura y Grabáu (dende los 10 años) y de Música (fechura d'instrumentos, relaxación y representación).      

Per otru llau, la Escuela Municipal de Cerámica collabora con colexos, asociaciones y otres entidaes como l'Asociación de Ceramistes Arxelinos, la Escuela Superior d'Arte d'Asturies, l'Axencia de Cooperación Internacional, el Muséu Internacional de Cerámica de Faenza, la Fundación Deportiva Municipal, o la Cruz Roxa. 

Pel añu académicu organízase l'actividá "Conocer el barru", na que más de mil alumnos y alunes de Primaria y Secundaria d'Avilés y la Comarca, d'ente 4 y 18 años, visiten la Escuela, participando nuna demostración de trabayu al tornu fecha por profesoráu del centru, pa que, dempués cada alumnu o alumna "cree" una pieza usando téuniques de mesa. En secando les obres d'estos  artistes, cuécense y dánse-yos como recuerdu de la so esperiencia.

Universidá Popular

La U.P. echó a andar en 1901, volviendo a entamar l'actividá en 2001 impartiendo les sos disciplines nel edificiu de la Factoría Cultural dende 2010,  calteniendo l'enfotu d'esparder la cultura ente la ciudadanía.

La educación en valores y na igualdá d'oportunidaes formen la exa vertebral dela so metodoloxía. Les materies y actividaes organícense al rodiu de les estayes que vienen darréu: Arte y Artesanía, Nueves Teunoloxíes de la Comunicación, Salú y Medioambiente, Idiomes y Comunicación, Historia y Historia l'Arte o Patrimoniu Cultural y Gastronómicu.

La U.P. organiza cursos pa mayores de 50 años dientro'l marcu del programa de dprendimientu a lo llargo la vida, entamáu pola Universidá d'Uviéu (PUMUO).

Centru de Creación Artística

El Centru de Creación Artística tien cuatro talleres p'artes plástiques. Hai agora un interés por afitar la xunión con Res Artis y ponese a trabayar nel programa d'artistes en residencia.

Ello va afayar l'usu del Centru Municipal d'Arte y Esposiciones CMAE pa organizar esposiciones y otros eventos col envis de puxar pol trabayu los y les artistes en residencia, dando amás agospiu de baldre o mui baratu, aprovechando l'albergue del Conceyu o l'Edificiu Fuero.

Ta en proyeutu l'apertura de varies sales dedicaes a ensayu pa músicos, ensayu de danza, caxa escénica, estudiu de grabación, sala de conferencies y un espaciu polivalente. 

Asinamesmo, dende la Factoría Cultural ta estudiándose'l mou pa poder alquilar los talleres que van tar preparaos p'artistes de cualquier disciplina, pa que puedan facer trabayos puntuales. 

Dientro los oxetivos del centru, tolos años s'organiza coincidiendo col mes d'agostu, el Certamen San Agustín de Cerámica, que nesti añu 2013 cumple la so 18ª edición. El Certamen tien l'envís d'igualar la cerámica, considerada erróneamente un arte menor, col restu disciplines artístiques, poniéndola nel sitiu que se merez. Participaron nél nomaos ceramistes españoles y internacionales, ente los que destaquen Tàpies, Chillida o Barceló.

En mayu organizóse la Feria de Cerámica na que participen una ventena ceramistes d'orixe diferente. La feria dura  tres díes, tien una esposición con obres de los participantes y entama'l concursu Villa d'Avilés, dotáu con 1.000,00 euros y sofitáu por una entidá bancaria rexonal. Destacar que los puestos y la participación na Feria ye de baldre.

En 2011 cellebróse la primer Nueche Blanca n'Avilés, coordinando dende la Factoría a galeríes y artistes pa ellaborar un ampliu programa d'actividaes (esposiciones, talleres, performances, conciertos, danza, etc.)

La Nueche Blanca afítase edición a edición, plantegando munches actuaciones pa que participe la ciudadanía activamente.

Dende la Factoría Cultural organícense talleres infantiles puntualmente, como'l qu'emitiere en 2011 rellacionáu cola cerámica y el grabáu en collaboración cola Selmana Nacional d'Arte Contemporaneu Al Norte, actividá que prestó muncho. 

La Factoría Cultural proyeuta delles esposiciones, tanto de fechura propia (Nueche Blanca, trabayos de fin de cursu, etc.), como d'artistes o coleutivos de fuera del centru, enseñando les obres nel mesmu centru o nel CMAE.

La característica más destacada de la Factoría Cultural ye que toles actividaes organizaes tán direutamente rellacionaes ente sí ensin importar la so procedencia. L'oxetivu ye que los talleres compartan conteníos, pa llegar a un intercambiu continuu de conocimientos.

La Factoría Cultural, enfotada nesto, participó al traviés de la Escuela Municipal de Cerámica, na edición ARCO d'esti exerciciu 2013, cellebrada en Zaragoza.

Esta participación consistió na organización d'un grupu formáu por 3 artistes plásticos y 4 ceramistes, dirixíu por un diseñador de productu, con un equipu que dio vida al puestu que se punxo nesta importante cita añal de la cerámica internacional en representación de la Factoría Cultural.

Factoría Cultural d'Avilés

Av de Portugal, 13

33402 Avilés. Asturies

Tfn.: 985 548 617

eceramica1@ayto-aviles.es  

HORARIU

Horariu de branu (xunetu a setiembre)

Llunes a vienres • 8:00 a 15:00h

Primera quincena d'agostu pesllao

Llunes a vienres • 8:00 a 15:00h

MATRÍCULES

El periodu de matriculación entama'l 2 de setiembre

Llunes a vienres • 09:00 a 13:00h

Calendariu d’eventos

anterior Avientu 2019 siguiente
ll ma mi xu vi do
1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31

Axenda

Espacio Atlántico - Programa TransnacionalInnovate - Promoting Economic ChangeUnión Europea - Fondo Europeo de Desarrollo Regional
  • © 2019 Fundación de Cultura. Conceyu d’Avilés. | Avisu llegal |