Revista dixital de la Fundación de Cultura del Conceyu d’Avilés Revista dixital de la Fundación de Cultura del Conceyu d’Avilés Añu 2021 -Númberu 34 - Ochobre 2021

Apúntate al nuestru boletín

Esposiciones

Esposición “In Itinere», d'Ángel Domínguez Gil y Jesús Castañón Loché

Centru Municipal d'Arte y Esposiciones (CMAE) y Factoría Cultural. Dende'l 20 d'ochobre hasta'l 19 de payares de 2021

Una de les actividaes de más raigón na programación cultural d'Avilés, el Certamen San Agustín de Cerámica, cumple nesti 2021 na so XXVI edición, y failo con una esposición n'homenaxe a Jesús Loché y Ángel Domínguez-Gil Juliana, col títulu d'In Itinere

Sedrá una amuesa doble, pa facela en dos espacios, el Centru Municipal d'Arte y Esposiciones, CMAE, onde se va ver la obra de Jesús Castañón, y la Factoría Cultural, na que se va repasar la d'Ángel Domínguez-Gil.

Como diz el propiu nome de la esposición, trátase d'un percorríu "nel camín" pola obra artística cerámica de los dos creadores asturianos, que fueron per caminos paralelos, dende qu'entamaron les sos carreres, hasta agora, nun 2021 nel que los dos se retiraron de los sos puestos como profesores de la Escuela Mundial de Cerámica.

Conociéronse na Escuela de Miranda d'Avilés, y dempués de pasar per varios centros, la Escuela de Cerámica volvió a uniles. Asina, esta esposición ye tamién un homenaxe a la so carrera como artistes, y tamién como profesores esenciales nel centru formativu avilesín, un repasu a la so aportación fundamental al arte en cerámica.

Ángel Domínguez-Gil Juliana

Ñació en Xixón en 1956, descubrió la técnica de la cerámica na década de los 70, de manos d'un alfareru tradicional . Profesor na Escuela de Cerámica d'Avilés, y según la descripción que fai d'él la Fundación Muséu Evaristo Valle, nes cuatro décades de trayectoria, "foi dende la busca de formes y testures a estudiar lo conceutual, dende onde sal la so creación y llaten les sos últimes obres. Un narrador que ta viéndolo too, xuega, provoca y denuncia; daquién que cuenta coses mirando al mundu de frente, a la xente y a les coses que pasen nuna visión inseparable de la esmolición que tien tol tiempu pola natura.

Espuso de forma individual, ente otros recintos, na Escuela Municipal de Cerámica d'Avilés (1988); Fundación Municipal de Cultura de Castrillón (1993); Galería Cornión, Xixón (2020), Área de Cultura del Ayuntamientu de Córdoba (2004); Muséu Barjola, Xixón (2007): Galería Octógono, Avilés (2013); Muséu Antón, Candás (2014); Fundación Muséu Evaristo Valle, Xixón (2019). Y de forma coleutiva na Galería Margall, Uviéu (1983); FITUR, Madrid (1985); VI Bienal d'Arte Ciudá d'Uviéu (1992); munchos certámenes de San Agustín, o na Feria Internacional de Cerámica Contemporánea CERCO 06.

Jesús Castañón Loché

Ñació en 1956 en Xixón, entamó la so formación en 1967 n'Agrupación Gijonesa de Bellas Artes. Dempués siguió la so formación de dibuxu y pintura con Luis Pardo y Alejandro Mieres. En 1976 fizo la so primer esposición individual con escultures feches con pieces metáliques de reciclaxe. En 1977 empezó a interesase nes posibilidaes plástiques qu'ofrez la cerámica, y ye na Escuela Municipal de Miranda d'Avilés, onde deprende a usar el tornu. Desenvuelve'l so llabor como profesor na Escuela Municipal de Cerámica d'Avilés Factoría Cultural.

A lo llargo de la so carrera artística, Jesús Castañón fizo varies esposiciones individuales y coleutives en diferentes sales y galeríes, asturianes, españoles y n'otros países d'Europa, recibiendo dellos premios y distinciones.  Individuales en Caxa d'Aforros d'Asturies, Xixón, (1976); Casa la Cultura, Avilés (1977); Galería Cornión, Xixón (1987);  Sargadelos, Compostela (1998); Arco de Cuchilleros, Madrid (1998); Muséu Antón, Candás (2004 y 2010), o Galería Franchini, Oporto (2009). Coleutives, en diferentes sitios d'España, de Zaragoza a Madrid, y internacionales en Portugal, Italia o Taiwán.

Ye dende l'añu 2011 miembru de l'Academia Internacional de la Cerámica (Xinebra, Suiza).

Más información

L'horariu de visita nel CMAE, cola obra de Jesús Castañón, sedrá de martes a domingu, de 18:00 a 21:00 hores. Na Factoría, l'amuesa d'Ángel Domínguez-Gil podrá vese de llunes a vienres, de 9:00 a 14:00 y de 16:30 a 21:00 hores.

Calendariu d’eventos

anterior Setiembre 2022 siguiente
ll ma mi xu vi do
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30
Espacio Atlántico - Programa TransnacionalInnovate - Promoting Economic ChangeUnión Europea - Fondo Europeo de Desarrollo Regional
  • © 2022 Fundación de Cultura. Conceyu d’Avilés. | Avisu llegal |