Revista dixital de la Fundación de Cultura del Conceyu d’Avilés Revista dixital de la Fundación de Cultura del Conceyu d’Avilés Añu 2019 -Númberu 26 - Ochobre 2019

Apúntate al nuestru boletín

Esposiciones

Exposición «Re-constructed memories», de Carmen Figaredo. El Papel del Collage en Valdecarzana

Palaciu de Valdecarzana. Dende'l 11 hasta'l 30 de setiembre de 2019

El poder evocador de la composición

N'Avilés tenemos recintos espositivos, como'l Palaciu de Valdecarzana, que se convierten n'interlocutores perfeutos ente la creación y el públicu. El nuestru compromisu ye'l d'enllenar tolos espacios culturales d'Avilés con propuestes nueves, siempre reparando nes últimes tendencies artístiques, con vocación multidisciplinar, nun escaparate qu'avere la cultura en toles sos estayes a les avilesines y los avilesinos, y qu'al empar seya quien a trayer y rellacionase con quien nos visite.

Per aciu de los y les creadores de casa, pero tamién de toa Asturies y coles puertes siempre abiertes a quien tenga daqué nuevo que dicir y qu'enseñar, venga d'onde venga.

Esti ye'l casu d'esta esposición nueva que va tar nun sitiu tan emblemáticu de la ciudá como'l Valdecarzana. Les persones que la visiten van atopase con una amuesa mui importante del talentu d'una artista asturiana entá mui moza con un futuru a nivel nacional y internacional perbonu, la uvieína Carmen Figaredo.

Tolo que sabe de retratos, disciplina pa la qu'empobinó una carrera que ta entamando, al mesmu tiempu que la moda y l'arte gráficu, dexáronla esplorar y esperimentar la so creatividá al empar d'otres disciplines pictóriques, y afondar nuna téunica, el collage, gracies a la que llega agora a Avilés.

Failo dientro'l proyeutu El Papel del Collage en Valdecarzana, qu'entamemos en 2017 p'averar esta forma d'espresión compositiva a Avilés, y facelo d'una manera cíclica, d'una manera que'l públicu, tanto'l qu'entiende como'l que non, afonde nella dende la inmediatez del contautu direutu cola obra, con artistes que manexen estilos y mensaxes estremaos.

En 2017 abrimos el ciclu con Collages, coles series Velos ye comelos, y Mutantes, de Paco Abril. En 2018 pudimos disfrutar del madrileñu Domingo Sanz cola so Xeometría y natura. Y nesti casu, Carmen Figaredo tráyenos Re-constructed memories, pensada y parida pa enseñala dende l'espaciu espositivu del Palaciu de  Valdecarzana.

El públicu va atopase con imáxenes evocadores, que-y van resultar familiares y  cercanes, porque Avilés ye l'auténticuprotagonista de les escenes representaes nes sos composiciones. Perfiles, paisaxes, ambientes paraos nel tiempu, la Ría, el Puertu, la industria, too metío dientro del nuestru ADN de ciudá llibre, abierta y acoyedora, son un llienzu nel que xurden momentos pasaos pela peñera del güeyu de quien fai'l retratu, y de quien recompón, recoloca, refai la realidá, apégala, reconstrúyela, como'l títulu de la esposición.

La fuerza creadora de Carmen Figaredo xurde ta en cada requexu, en cada centímetru de les obres que se van poder contemplar nesta amuesa única. Con estes llinies animo a visitala y disfrutala: nun va defraudar.

Yolanda Alonso, conceyala de Cultura y Promoción de Ciudá

Collages Carmen Figaredo. Re-constructed memories XRe-constructed memories

« Nel retratu hai una realidá tan especial que llega a ser más de verdá que la propia realidá».

Alfred Stieglitz - The Real Thing. Imitation and Authenticity in American Culture, 1880-1940, M. Orvell (1989). p. 220

Entiéndese'l retratu como un procedimientu que dexa garrar imáxenes fixes de la realidá, asoleyando una superficie sensible. Como resultáu, quédanos un soporte, con una riestra reaiciones químiques, tinta o lluz nuna pantalla, na que somos quien a lleer y entender el resultáu. Igual porque'l retratu da información nel mesmu llinguax col que falen los nuestros güeyos.

Siempre creí que nun hai nada menos «real» qu'un retratu. Too al rodiu d'él ye relativo, dependiendo del criteriu  d'un xuez nada imparcial, la persona que ta tres la máquina, el fotógrafu.  ¿Cómo vamos poder tomar como referencia única y de verdá d'un momentu o fechu un rectángulu d'una realidá indudablemente más grande? El güeyu y el maxín tres de la máquina de retratar deciden qué s'inclui y qué queda fuera d'esi marcu de «realidá».

Collages Carmen Figaredo. Re-constructed memories XIIUn retratu ye un momentu concretu, una riestra circunstancies resumíes, cachos d'información dientro d'un solu envase. Ye tiempu; en retratando'l suxetu, ésti conviértese en parte del pasáu. Ye un recuerdu; un gatillu que ye quien a disparar tou tipu d'emociones sinestésiques. Ye más qu'una riestra reaiciones químiques o un pocu tinta nun papel. Magar que pienso que nun ye una referencia de la realidá, creo que delles veces sí reflexa cachos d'ella. Rellumos d'histories que quedaron fuera l'escenariu.

Toles imáxenes se creen pa que se vían, non sólo dende l'emplegu práuticu del retratu, nin como resultáu de creación artística. Cualquier oxetu  d'espresión plástica nun puede esistir si nun hai daquién que lu mire. Lo mesmo si pensamos en retratos que facemos y nun revelamos enxamás, o que nun enseñamos a naide nunca, éstes, tán na cabeza del que retrata. El creador pue ser l'únicu espectador. Pero xeneralmente, non sólo'l fotógrafu ye l'únicu espectador d'una imaxen; suelen enseñase a muncha xente, a un públicu infinitu, si tenemos en cuenta la teunoloxía qu'hai agora. Cada persona fai la so propia llectura d'una mesma imaxen, aportando datos y idees, y interpretándolo d'una forma única. Incluso'l mesmu individuu interactúa d'una forma diferente cola mesma imaxen a lo llargo'l tiempu. Impórtenme sobre too eses infinites posibilidaes d'una mesma cosa.

Collages Carmen Figaredo. Re-constructed memories VYe un impulsu ñatural pa mi, pensar en qué hai tres de les imáxenes, d'otra xente o míes. Delles veces el mensaxe ye claru. Otres, necesito reorganizales pa tener en cuenta les otres realidaes que pue haber. Atopo la mio ferramienta creativo nel actu de cortar y pegar. El collage nun me dexa apegar pieces diferentes nun tou únicu. Faigo un examen casi científicu de les imáxenes, esmigayo y reviso los escenarios posibles, y dempués xúntolos nuna mesma pieza física. Delles veces, l'actu de cortar, de dexar vacíu a la vista, ye lo necesario. Andar tocando los retratos físicamente, ye dalgo que ta dientro'l mio rocesu creativu.  

Nesti casu, céntrome nel aspeutu físicu del retratu como oxetu. Pieza única como si fuere un neutru de materia, pero que yo esmigayo y remiro p'analizar la información que contién. Alterándola póngola a prueba, intentando atopar otros aspeutos, otres histories y otres composiciones de sí mesma. Uso Avilés como suxetu del mio esperimentu. Ye un sitiu que ta en momentos mui diferentes de la mio vida. Eses imáxenes llaraes d'alcordances, entemézoles con imáxenes físiques de distintes époques, construyendo imáxenes nueves y pequeñes, interpretaciones diferentes.  

Más información

Palaciu de Valdecarzana

Cai del Sol, 2

33402 Avilés

T. 985 510 667

Entrada llibre y de baldre hasta completar aforu

Calendariu d’eventos

anterior Payares 2019 siguiente
ll ma mi xu vi do
1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30

Axenda

Espacio Atlántico - Programa TransnacionalInnovate - Promoting Economic ChangeUnión Europea - Fondo Europeo de Desarrollo Regional
  • © 2019 Fundación de Cultura. Conceyu d’Avilés. | Avisu llegal |