Revista dixital de la Fundación de Cultura del Conceyu d’Avilés Revista dixital de la Fundación de Cultura del Conceyu d’Avilés Añu 2019 -Númberu 26 - Ochobre 2019

Apúntate al nuestru boletín

Esposiciones

Esposición «El señor de la mar. Pedro Menéndez d'Avilés»

Casa la Cultura. Dende'l 4 de mayu hasta'l 15 de setiembre de 2019 (prolongada hasta 12 de xineru de 2020)

La esposición El señor de la mar, entamada pol Conceyu d'Avilés, fai alcordanza de la figura poliédrica de Pedro Menéndez d'Avilés y asoleya lo arteru que yera como marín, estratega, científicu, maxineru naval o coordinador d'aiciones enforma enguedeyaes como'l desplazamientu d'un cientu barcos de la Flota d'Indies, cordón umbilical ente España y América.

El públicu va tener delantre un material que nun s'asoleyare enxamás  con fontes orixinales en forma de maquetes, cartes, mapes, llienzos y material audiovisual pa poder asina conocer al Adelantáu de La Florida dende'l rigor d'un tratamientu modernu y científicu.

Pedro Menéndez d'Avilés foi muncho más que l'Adelantáu de La Florida: un personaxe decisivu na historia d'España nel sieglu XVI. El trabayu de documentación sobre la figura del marín avilesín que ficieron los comisarios Ramón Vega y Hugo Vázquez terminó nesta esposición El señor de la mar.

Esta amuesa, encargada pol Conceyu nel marcu del programa d'actos que festexen el Quintu Centenariu del Nacimientu de Pedro Menéndez, va dexar que'l públicu llegue a esta figura dende'l rigor historiográficu d'una investigación científica. Tien la collaboración d'instituciones del prestixu de la Universidá de Stanford, la Universidá d'Uviéu, el Muséu Naval de Madrid, la Fundación Alvargonzález, Glencore, l'Autoridá Portuaria d'Avilés o la Institución Fernando'l Católicu.

Gracies al plantegamientu de la esposición, va apaecer delantre les persones que visiten la esposición un Pedro Menéndez poliédricu, muncho más qu'un simple marín que se convirtió n'Adelantáu de La Florida y fundó San Agustín, la primer ciudá de los Estao Xuníos d'agora. Un personaxe del so tiempu que destacaba en varies coses: marinu, estratega, científicu, maxineru naval o coordinador d'aiciones tan enguedeyaes como los desplazamientos d'un cientu barcos, organizador de la Flota d'Indies, el cordón umbilical ente España y América.

El trabayu de documentación afayó la posibilidá de poder algamar  un material entá ensin asoleyar y  fontes orixinales d'una decena de países, d'achivos públicos y privaos, con pliegos, cartes de los protagonistes, llenzos de la época, inventarios, diarios...Y el cumal ye un estudiu mui variáu que tien dende datos botánicos hasta antropolóxicos, artísticos, d'arquiteutura o de facer barcos.  

L'amuesa rellaciona momentos de la so vida cola sociedá d'esa dómina, y presenta al públicu munchu material y mui variáu, dende reproducciones de los barcos más usaos por Pedro Menéndez, como'l San Pelayo o los  «galeones agaleraos» diseñaos por él. Pero tamién paneles esplicativos, reproducciones, mapes de la época, cartes, documentos, o material audiovisual como un refaimientu en 3D del primer mapa completu del asentamientu que funda, San Agustín de la Florida.

Estayes temátiques

•1. Toles coses que fizo enantes de la reconquista de La Florida, foi dende cazador de pirates hasta marinu de confianza del príncipe Felipe, el que diba reinar col nome de Felipe II.

•2.  «El señor del Atlánticu», el principal marinu de la corona española nel océanu, pero tamién maxineru naval y inventor.

•3.  El so  papel d'Adelantáu y de Gobernador, y la güelga que dexó en La Florida.

•4.  Espaciu de memoria, que recueye cómo se trató la so figura nel tiempu y les diferentes iniciatives que reivindicaron lo importante que foi na historia d'España.

Los comisarios

Ramón Vega (Universidá d'Uviéu; CESBOR, Centru d'Estudios Borjanos). Trabayó como investigador y comisariu d'esposiciones pal Muséu Naval de Madrid, con más de trenta publicaciones científiques y collaboraciones nacionales (I+D+i) y internacionales al llombu.

Hugo Vázquez (Universidá d'Uviéu; CESBOR, Centru d'Estudios Borjanos). Investigador, paleógrafu y documentalista. Collaboró n'esposiciones del Muséu del Exércitu. Tien varios llibros que traten el tema de la organización militar y funcionarial de la época de Pedro Menéndez, amás de ser referente en varies investigaciones y proyeutos, ente los que destaca l'estudiu de les conocíes como «cuentes del Gran Capitán».

Más información

Casa la Cultura

Plaza Domingo Álvarez Acebal, 2

33402 Avilés. Asturies

T: 985 51 04 39 / 985 51 04 52

HORARIU

Llunes a sábados: 11:00 a 13:00 h y de 18:00 a 21:00 h

Domingos y festivos: 11:00 a 14:00 h

  • © 2019 Fundación de Cultura. Conceyu d’Avilés. | Avisu llegal |